Gefundene Einträge
| Buch | Kapitel | Vers | Text |
| 1 Mose | 2 | 3 | ג ויברך אלהים את יום השביעי ויקדש אתו כי בו שבת מכל מלאכתו אשר ברא אלהים לעשות {פ} |
| 1 Mose | 2 | 4 | ד אלה תולדות השמים והארץ בהבראם ביום עשות יהוה אלהים--ארץ ושמים |
| 1 Mose | 2 | 5 | ה וכל שיח השדה טרם יהיה בארץ וכל עשב השדה טרם יצמח כי לא המטיר יהוה אלהים על הארץ ואדם אין לעבד את האדמה |
| 1 Mose | 2 | 6 | ו ואד יעלה מן הארץ והשקה את כל פני האדמה |
| 1 Mose | 2 | 7 | ז וייצר יהוה אלהים את האדם עפר מן האדמה ויפח באפיו נשמת חיים ויהי האדם לנפש חיה |
| 1 Mose | 2 | 8 | ח ויטע יהוה אלהים גן בעדן--מקדם וישם שם את האדם אשר יצר |
| 1 Mose | 2 | 9 | ט ויצמח יהוה אלהים מן האדמה כל עץ נחמד למראה וטוב למאכל--ועץ החיים בתוך הגן ועץ הדעת טוב ורע |
| 1 Mose | 2 | 10 | י ונהר יצא מעדן להשקות את הגן ומשם יפרד והיה לארבעה ראשים |
| 1 Mose | 2 | 11 | יא שם האחד פישון--הוא הסבב את כל ארץ החוילה אשר שם הזהב |
| 1 Mose | 2 | 12 | יב וזהב הארץ ההוא טוב שם הבדלח ואבן השהם |
| 1 Mose | 2 | 13 | יג ושם הנהר השני גיחון--הוא הסובב את כל ארץ כוש |
| 1 Mose | 2 | 14 | יד ושם הנהר השלישי חדקל הוא ההלך קדמת אשור והנהר הרביעי הוא פרת |
| 1 Mose | 2 | 15 | טו ויקח יהוה אלהים את האדם וינחהו בגן עדן לעבדה ולשמרה |
| 1 Mose | 2 | 16 | טז ויצו יהוה אלהים על האדם לאמר מכל עץ הגן אכל תאכל |
| 1 Mose | 2 | 17 | יז ומעץ הדעת טוב ורע--לא תאכל ממנו כי ביום אכלך ממנו--מות תמות |